ఓహియోలో సంక్రాంతి శోభ

సంక్రాంతి శోభ ప్రవాసాంధ్రంలో వెల్లివిరిసింది. తెలుగువాళ్లు ఎక్కడున్నా.. మన సంప్రదాయాలను మరచిపోరని ప్రతి యేటా నిరూపిస్తూనే ఉన్నారు . సప్త సముద్రాలు దాటి వెళ్లినా.. సంప్రదాయానికి వారు ఎంత ప్రాధాన్యం ఇస్తున్నారనేది వారు నిర్వహించే సంక్రాంతి సంబరాల్లోనే తెలిసిపోతుంది. సంక్రాంతికి ఇంకా హైదరాబాద్ నుంచి తమ సొంత ఊళ్లకు వెళ్థామా..? వద్దా..? పండుగ ఎక్కడ జరుపుకుందామని ఆలోచించేవాళ్లు చాలా మందే ఉంటారు. కానీ వీరందరి కంటే ముందున్నారు అమెరికాలో మన తెలుగువాళ్లు. సంక్రాంతి ముగ్గులతో ఇంగ్లీష్ వీధులను అలంకరించారు. అమెరికాలో కొలంబస్ ( ఒహియో )లో సంక్రాంతి ముగ్గుల పోటీలు జరిపారు. అక్కడున్న తెలుగువారి కోసం తెలుగు అసోసియేషన్ ఆఫ్ సెంట్రల్ ఓహియో టాకో నిర్వహించిన ఈ ముగ్గుల పోటీలకు తెలుగు మహిళలు కొంగు బిగించి మరీ..ముగ్గుల పోటీల్లో పాల్గొన్నారు. అందమైన రంగవల్లికలు వేయడంలో చాలా మంది పోటీ పడ్డారు.అయితే ఈ పోటీలో కల్ప దోనేపూడి, అపర్ణ సంగ, శ్రీలత, విశాల గార్ల లు విజేతలుగా నిలిచారు. వీరికి శ్రీరాములు బోడావుల, పద్మా పట్టిసపులు బహుమతి ప్రధానం చేశారు. అందమైన రంగవల్లికలే కాదు..సంక్రాంతి ఎగిరే గాలిపటాలు కూడా అమెరికాలో రెపరెపలాడాయి. పిల్లలకు గాలిపటాల పోటీలు పెట్టి..వారు కూడా మన సంస్కృతిని మరచిపోకుండా చేశారు.గాలి పటాల పోటీల్లో విజేతలుగా నిలిచిన స్వాతి, శిల్పలకు చంద్రశేఖర్ రాయల బహుమతి ప్రధానం చేశారు. తెలుగు సంస్కృతి, సంప్రదాయాలు ఉట్టిపడేలా ఈ పోటీలను నిర్వహించిన టాకో అధ్యక్షులు శ్రీనివాస్ సంగకు అభినందనల వర్షం కురిసింది.

తెలుగు వారు ఎక్కడున్నా..ఇలా అందరూ కలిసి ఏ కార్యక్రమం చేసుకున్నా.. తెలుగుశక్తి అభినందనలు తెలియచేస్తుంది. తెలుగు సంస్కృతి, సంప్రదాయాలకు ఏ కార్యక్రమానికైనా తెలుగుశక్తి సంపూర్ణ మద్దతు తెలుపుతుంది. ఏ దేశమేగినా..ఎందుకాలిడినా పొగడరా నీ తల్లి తెలుగు భారతిని..